PROGRO nədir
Peşəkar İnkişaf və İnnovasiyalar Platforması (PROGRO) işaxtaran və işə götürənləri birləşdirən inkişaf şəbəkəsidir. Platforma olaraq məqsədimiz peşəkar inkişafla bağlı maarifləndirmə, sosial əlaqələrin yaradılması və məşğulluğun artırılmasıdır.
Peşəkar səriştəli gənclərin yetişdirilməsi və onların əmək bazarına inteqrasiyası platformanın əsas fəaliyyətlərindəndir. Şəxsi inkişaf və karyera planlaması ilə bağlı təlimlərin keçilməsi, işgüzar görüşlərin təşkil olunması və şəbəkələşmə də fəaliyyətlərimiz sırasına daxildir. Məqsəd gənclərin istiqamətləndirilməsi, əmək bazarının tələblərinə əsasən labüd bacarıqlara yiyələnməsi, inkişafa və yeniliklərə meyilli məqsədyönlü fərdlərin cəmiyyətə və əmək bazarına qazandırılmasıdır. Platformanın başqa bir istiqaməti isə əmək bazarında iş axtaran və işəgötürən arasındakı sosial əlaqələrin inkişaf etdirilməsidir.
Hədəf qrupumuz peşəkar inkişafa meyilli iş axtaran gənclər və peşəkar işçi axtarışında olan sahibkarlardır.
PROGRO Platformasının əsas icra mexanizmləri fiziki məkan kimi Gənclərin Peşəkar İnkişaf Mərkəzləri və rəqəmsal məkan kimi PROGRO Veb Portalıdır. Bu Mərkəzlər hazırda Gəncə, Zaqatala və Sumqayıtda fəaliyyət göstərir. Mərkəzlərin fəaliyyətinə daxildir:
-
Gənclərə 2 ay ərzində peşəkar səriştələr üzrə təlimlərin keçilməsi və fəal surətdə iş axtarışı;
- Gənclərin sosial və intellektual ünsiyyəti üçün tədbirlərin keçirilməsi;
- Gənclərə əlavə iş təcrübəsi qazanma imkanının verilməsi;
- Gənclərə mentorluq xidmətinin göstərilməsi;
- Gənclərlə sahibkarların əlaqələndirilməsi;
- Gənclərin sahibkarlığına dəstək;
- Bizneslər üçün işçi təminatının həyata keçirilməsi;
- Sahibkarlar üçün şəbəkələşmə tədbirlərinin təşkil edilməsi.
PROGRO Platforması tərəfindən təqdim edilən bütün xidmətlər ödənişsizdir.
PROGRO Platforması BMT-nin İnkişaf Proqramı ilə Əmək və Əhalinin Sosial Müdafiəsi Nazirliyi yanında Dövlət Məşğulluq Agentliyinin birgə əməkdaşlığı çərçivəsində yaradılmışdır və ABŞ Beynəlxalq İnkişaf Agentliyi (USAİD) tərəfindən maliyyələşdirilir.
Layihə haqqında
“Peşəkar İnkişaf və İnnovasiyalar Platforması” (“Professional Growth and Innovations Platform – PROGRO”) 2019-cu ildə BMT İnkişaf Proqramı ilə Əmək və Əhalinin Sosial Müdafiəsi Nazirliyinin birgə həyata keçirdiyi və Amerika İnkişaf Agentliyi (USAID) tərəfindən maliyyələşən “Azərbaycanda İnnovasiya və Məşğulluğun İnkişafı” layihəsi çərçivəsində hazırlanmışdır. Platformanın məqsədi Azərbaycanda əhalinin, xüsusilə gənclərin əmək bazarının müasir tələblərinə və gələcək perspektivlərinə cavab verən peşəkar və səriştəli gənclər yetişdirmək, eləcə də onların uzunmüddətli məşğulluğu və özünüməşğulluğuna xidmət etməkdir.
PROGRO Platforması 2011-2019-cu illər ərzində icra olunmuş“Azərbaycanda İnnovasiya və Məşğulluğun İnkişafı” layihəsinin təcrübəsi, metodoloji bazası və təhlili üzərində yaradılmışdır. Bu dövrdə layihə Norveçin “İnnovasiyalar və Məşğulluq üzrə Sistem Laboratoriyası” (“Systems Laboratory for Innovation and Employment – SYSLAB”) metodologiyasına əsasən Bakı, Sumqayıt, Gəncə, Masallı və Zaqatalada fəaliyyət göstərən SYSLAB Mərkəzləri 812 gəncə effektiv məşğulluq sahəsində silsilə təlimlər keçmiş, onların 617 nəfəri (76%) təlimlər zamanı və ya tezliklə sonra işlə təmin olunmuşdur. Layihə həmçinin Tovuz, Bərdə, Şəki, Gədəbəy və Qəbələ rayonlarında 100 nəfər gəncin iştirakı ilə intensiv karyera seminarları (“Mobil-Syslab”) da təşkil etmişdir. USAID təşkilatının maliyyə dəstəyi ilə 2016-2018-ci illərdə Masallıda sınaqdan keçirilmiş layihə 2016-cı ildən Gəncədə, 2019-cu ildən Zaqatalada, 2020-ci ildən isə Sumqayıtda icra olunur və 2022-ci ilədək davam edəcəkdir.