kob-inkisaf-merkezleri-sahibkarlarin-elaqelendirilmesine-ve-tecrube-mubadilesine-desteyini-davam-etdirir--

KOB inkişaf mərkəzləri sahibkarların əlaqələndirilməsinə və təcrübə mübadiləsinə dəstəyini davam etdirir

Kiçik və Orta Biznesin İnkişafı Agentliyinin (KOBİA) Ağsu-Kürdəmir, Şəmkir-Gədəbəy və Daşkəsən-Göygöl KOB inkişaf mərkəzlərinin təşkilatçılığı ilə heyvandarlıq sahəsində fəaliyyət göstərən fermerlərin “Azərsun Şamaxı Aqropark”ına infoturu təşkil edilib. 

Sahibkarlar arasında əməkdaşlığın qurulması və mövcud əlaqələrin inkişaf  etdirilməsi, qarşılıqlı təcrübə mübadiləsi məqsədilə təşkil olunmuş tədbirdə 6 rayondan 20 fermer iştirak edib. İnfotur çərçivəsində sahibkarlar əkin sahəsində və heyvandarlıq kompleksində olublar. Aqroparkın mütəxəssisləri iştirakçıları müxtəlif interaktiv metodlardan istifadə olunmaqla müasir heyvandarlıq komplekslərinin avtomatlaşdırılması, heyvanların sağlamlığına, qidalanmasına, südün keyfiyyətinə nəzarəti təmin edən xüsusi elektron sistem, eləcə də cins heyvanların düzgün qaydada saxlanılması və onlara qulluqla bağlı məlumatlandırıblar. 

Tədbir çərçivəsində həmçinin, Ağsu-Kürdəmir KOB İnkişaf Mərkəzində “KOB-ların klasterləşməsi” mövzusunda təlim keçirilib. Sahibkarlara heyvandarlıq sahəsində klasterlərin yaradılması, onun səmərəliliyi, klasterlərlə bağlı qanunvericilikdəki yeniliklər barədə məlumat verilib. Bundan başqa, maliyyə resurslarına çıxış, çevik idarəetmə sistemi və səmərəli əlaqələndirmə mexanizminin tətbiqi ilə biznesin inkişaf etdirilməsi, rəqabətqabiliyyətliyin artırılması, yerli və xarici investisiyaların cəlb edilməsi yolları izah olunub, sahibkarların müvafiq sahədə təklifləri dinlənilib, onları maraqlandıran suallar cavablandırılıb.